କିଟ୍ ଛାତ୍ରୀନିବାସରେ ନେପାଳୀ ଛାତ୍ରୀଙ୍କ ଆତ୍ମହତ୍ୟା ଘଟଣା
କିଟ୍ ଛାତ୍ରୀନିବାସରେ ଜଣେ ନେପାଳୀ ଛାତ୍ରୀଙ୍କ ଆତ୍ମହତ୍ୟା ଘଟଣାରେ ଜାତୀୟ ମାନବାଧିକାର କମିସନ୍ (ଏନ୍ଏଚ୍ଆର୍ସି) ଙ୍କ ପକ୍ଷରୁ କରାଯାଇଥିବା ପ୍ରୋସିଡିଂ ଉପରେ ହାଇକୋର୍ଟ ସୋମବାର ରହିତାଦେଶ ଜାରି କରିଛନ୍ତି । ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଏନ୍ଏଚ୍ଆର୍ସିଙ୍କ ଆଦେଶ ଆଧାରରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବ ନାହିଁ ବୋଲି କିଟ୍ ବିଶ୍ୱବିଦ୍ୟାଳୟ ରେଜିଷ୍ଟ୍ରାରଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ହାଇକୋର୍ଟର ବିଚାରପତି ଜଷ୍ଟିସ୍ ଏସ୍.କେ. ପାଣିଗ୍ରାହୀ ନିର୍ଦ୍ଦେଶ ଦେଇଛନ୍ତି । ଏଥିସହ ରାଜ୍ୟ ସରକାର, ଏନ୍ଏଚ୍ଆର୍ସି ଏବଂ ଅନ୍ୟାନ୍ୟ ପକ୍ଷଙ୍କୁ ଜବାବ ଦାଖଲ ଲାଗି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।
ମାମଲାରୁ ଜଣାଯାଇଛି ଯେ, କିଟ୍ରେ ପଢୁଥିବା ନେପାଳର ଜଣେ ଛାତ୍ରୀ ଆତ୍ମହତ୍ୟା କରିଥିଲେ । ଏହି ଘଟଣାକୁ ନେଇ ଖୋର୍ଦ୍ଧା ଜିଲ୍ଲା ଶିଶୁ ମଙ୍ଗଳ କମିଟି ପକ୍ଷରୁ ତଦନ୍ତ କରାଯାଇ କିଟ୍ ବିରୋଧରେ କେତେକ ନିର୍ଦ୍ଦେଶନାମା ଜାରି କରାଯାଇଥିଲା । ଏହି ଆଦେଶ ବିରୋଧରେ କିଟ୍ ପକ୍ଷରୁ ହାଇକୋର୍ଟରେ ଏକ ମାମଲା ରୁଜୁ ହୋଇଥିଲା । ଅପରପକ୍ଷରେ ଛାତ୍ରୀଙ୍କ ଆତ୍ମହତ୍ୟା ଘଟଣାକୁ ନେଇ ଜାତୀୟ ମାନବାଧିକାର କମିସନ ଗତ ମାର୍ଚ୍ଚ ୩ ତାରିଖରେ କଗ୍ନିଜାନ୍ସ ଗ୍ରହଣ କରିଥିଲେ । ଏଥିସହ ତଦନ୍ତ ପାଇଁ କମିସନ୍ଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା । ଏନ୍ଏଚ୍ଆର୍ସି ପକ୍ଷରୁ ଏକ୍ ଫ୍ୟାକ୍ଟ ଫାଇଣ୍ଡିଂ ଟିମ୍ ମଧ୍ୟ ଗଠନ କରାଯାଇଥିଲା । ଏହାପରେ ଏନ୍ଏଚ୍ଆର୍ସି ଟିମ୍ କିଟ୍ ଆସି ଘଟଣାର ତଦନ୍ତ କରିବା ସହ ଗତ ମାର୍ଚ୍ଚ ୨୭ରେ ଆଦେଶ ମଧ୍ୟ ଦେଇଥିଲେ । ଏନ୍ଏଚ୍ଆର୍ସିଙ୍କ ଏଭଳି କାର୍ଯ୍ୟାନୁଷ୍ଠାନକୁ ବିରୋଧ କରି ଆବେଦନକାରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
