ଗୌତମ ଗମ୍ଭୀରଙ୍କୁ ହତ୍ୟା ଧମକ, ଇମେଲ୍ ମାଧ୍ୟମରେ ଧମକ ପଠାଇଲା ISIS କାଶ୍ମୀର
ପହଲଗାମ୍ ଆତଙ୍କୀ ହମ୍ଲା ମଧ୍ୟରେ ଭାରତୀୟ କ୍ରିକେଟ ଦଳର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଗମ୍ଭୀରଙ୍କୁ ହତ୍ୟା ଧମକ ମିଳିଛି । କୁହାଯାଉଛି ଯେ ଗମ୍ଭୀରଙ୍କୁ ଇମେଲ୍ ମାଧ୍ୟମରେ ଧମକ ପଠାଯାଇଥିଲା । ଯେଉଁଠାରେ କେହି କେବଳ ତିନୋଟି ଶବ୍ଦ ଲେଖିଥିଲେ – I kill You । ତେବେ ଗମ୍ଭୀର ତୁରନ୍ତ ଏହି ଇମେଲ୍ ବିଷୟରେ ପୋଲିସକୁ ଜଣାଇଥିଲେ ଏବଂ ଆନୁଷ୍ଠାନିକ ଭାବରେ ଅଭିଯୋଗ ଦାଖଲ କରିଥିଲେ । ସେପଟେ ଏହି ମାମଲାର ଗମ୍ଭୀରତା ଦେଖି, ଦିଲ୍ଲୀ ପୋଲିସ ତୁରନ୍ତ ସକ୍ରିୟ ହୋଇଯାଇଛି । ପ୍ରାରମ୍ଭିକ ତଦନ୍ତ ଅନୁସାରେ ଏହି ଧମକ ISIS କାଶ୍ମୀର ଦେଇଛି ବୋଲି ପୋଲିସ୍ ଜାଣିବାକୁ ପାଇଛି ।
ପୋଲିସ ଅଧିକାରୀଙ୍କ କହିବା ଅନୁଯାୟୀ, ଗୌତମ ଗମ୍ଭୀରଙ୍କୁ ଏହି ଇମେଲ୍ କିଏ ପଠାଇଛି ସେହି ବ୍ୟକ୍ତିକୁ ଚିହ୍ନଟ କରିବାକୁ ପ୍ରୟାସ କରାଯାଉଛି । ଏଥିପାଇଁ, ସାଇବର ସେଲ୍ ଟିମ୍ ଇମେଲକୁ ଟ୍ରାକ୍ କରିବାକୁ ଚେଷ୍ଟା କରୁଛି ଏବଂ ବୈଷୟିକ ବିଶ୍ଳେଷଣ ମାଧ୍ୟମରେ ଏହାର ତଦନ୍ତ ଜାରି ରହିଛି । ଏହି ଇମେଲ୍ କିଏ ଏବଂ କେଉଁଠାରୁ ପଠାଇଛି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
ଅନ୍ୟପକ୍ଷରେ ଗୌତମ ଗମ୍ଭୀରଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ଯେ, ଗୌତମ ଗମ୍ଭୀରଙ୍କୁ ‘ISIS କାଶ୍ମୀର’ ପକ୍ଷରୁ ହତ୍ୟା ଧମକ ମିଳିଛି । ବୁଧବାର ଦିନ ସେ ଦିଲ୍ଲୀ ପୋଲିସ ସହିତ ଯୋଗାଯୋଗ କରି ଏହି ମାମଲାରେ ଏଫଆଇଆର ପଞ୍ଜିକରଣ କରିଥିଲେ । ଏହା ସହିତ ସେ ତାଙ୍କ ପରିବାରର ସୁରକ୍ଷା ବୃଦ୍ଧି କରିବାକୁ ମଧ୍ୟ ଦାବି କରିଛନ୍ତି ।
ତେବେ ଏହି ମାମଲାରେ ଦିଲ୍ଲୀ ପୋଲିସ ପକ୍ଷରୁ ପ୍ରତିକ୍ରିୟା ମଧ୍ୟ ଆସିଛି । ଦିଲ୍ଲୀ ପୋଲିସ କହିଛି- ଆମେ ଏକ ଇମେଲ୍ ବିଷୟରେ ସୂଚନା ପାଇଛୁ, ଯେଉଁଥିରେ ଗୌତମ ଗମ୍ଭୀରଙ୍କୁ ଧମକ ଦିଆଯାଇଛି । ଆମେ ଏହି ଘଟଣାର ତଦନ୍ତ କରୁଛୁ । ଗମ୍ଭୀର ପୂର୍ବରୁ ଦିଲ୍ଲୀ ପୋଲିସର ସୁରକ୍ଷାରେ ଅଛନ୍ତି । ଆମେ ତାଙ୍କ ସୁରକ୍ଷା ସମ୍ବନ୍ଧୀୟ ନିର୍ଦ୍ଦିଷ୍ଟ ସୂଚନା ସାର୍ବଜନୀନ କରିପାରିବୁ ନାହିଁ ବୋଲି ଦିଲ୍ଲୀ ପୋଲିସ୍ ପକ୍ଷରୁ କୁହାଯାଇଛି । ତେବେ ଏହା ପ୍ରଥମ ଥର ନୁହେଁ ଯେ ଗୌତମ ଗମ୍ଭୀରଙ୍କୁ ଧମକ ମିଳିଛି, ଏହା ପୂର୍ବରୁ ମଧ୍ୟ ଗମ୍ଭୀରଙ୍କୁ ଧମକ ମିଳିଛି । ନଭେମ୍ବର ୨୦୨୧ରେ ଯେତେବେଳେ ଗୌତମ ଗମ୍ଭୀର ସାଂସଦ ଥିଲେ ସେ ଏହିପରି ହତ୍ୟା ଧମକ ପାଇଥିଲେ ।
