ଜନଗଣନା ନେଇ କେନ୍ଦ୍ରର ବିଚାର
ସରକାରୀ ସୂତ୍ରରୁ ମିଳିଥିବା ଏକ ସୂଚନା ଅନୁଯାୟୀ, ଜାତିଗତ ଜନଗଣନା ପାଇଁ ବିରୋଧୀ ତଥା ନିଜର କେତେକ ସହଯୋଗୀ ଦଳ ପକ୍ଷରୁ ଦାବି ଉଠିବା ପରେ କେନ୍ଦ୍ର ଏ ନେଇ ବିଚାରବିମର୍ଶ କରୁଥିବା ଜଣାପଡ଼ିଛି।କୋଭିଡ୍-୧୯ ମହାମାରୀ ଯୋଗୁ ବିଳମ୍ବିତ ହୋଇଥିବା ଜନଗଣନାରେ ଏକ ଜାତିଗତ ସ୍ତମ୍ଭ ଯୋଡ଼ିବାକୁ କେନ୍ଦ୍ର ବିଚାର କରୁଛି। ଅଗଷ୍ଟ ମାସରେ ଇଣ୍ଡିଆ ଟୁଡେର ମୁଡ୍ ଅଫ୍ ଦି ନେସନ୍ (ଏମ୍ଓଟିଏନ୍) ସର୍ଭେର ତଥ୍ୟକୁ ଉଦାହରଣ ଦେଇ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ କହିଥିଲେ, ମୋଦିଜୀ, ଯଦି ଆପଣ ଜାତିଗତ ଜନଗଣନା ବନ୍ଦ କରିବାକୁ ଚିନ୍ତା କରୁଛନ୍ତି, ତେବେ ଆପଣ ସ୍ୱପ୍ନ ଦେଖୁଛନ୍ତି- କୌଣସି ଶକ୍ତି ବର୍ତ୍ତମାନ ଏହାକୁ ରୋକିପାରିବ ନାହିଁ। ଭାରତର ଆଦେଶ ଆସିଛି – ଖୁବ୍ଶୀଘ୍ର ୯୦ ପ୍ରତିଶତ ଭାରତୀୟ ଜାତିଗତ ଜନଗଣନାକୁ ସମର୍ଥନ କରିବେ ଏବଂ ଦାବି କରିବେ।,। ଏମ୍ଓଟିଏନ୍ ସର୍ଭେ ଅନୁଯାୟୀ, ୭୪ ପ୍ରତିଶତ ଉତ୍ତରଦାତା ଜାତିଗତ ଜନଗଣନାକୁ ସମର୍ଥନ କରିଥିଲେ, ଯାହା କି ଗତ ଫେବ୍ରୁଆରି ମାସରେ ହୋଇଥିବା ସର୍ଭେ ସମୟରେ ୫୯ ପ୍ରତିଶତ ଥିଲା। କେବଳ ବିରୋଧୀ ନୁହନ୍ତି, ସାଂସଦ ଚିରାଗ ପାସୱାନଙ୍କ ଏଲ୍ଜେପି ଏବଂ ବିହାରରେ ନୀତୀଶ କୁମାରଙ୍କ ଜେଡିୟୁ ଭଳି ବିଜେପିର କିଛି ସହଯୋଗୀ ଦଳ ମଧ୍ୟ ଦେଶବ୍ୟାପୀ ଜାତିଗତ ଜନଗଣନାକୁ ସମର୍ଥନ କରୁଛନ୍ତି।
ବିହାରର ଶାସକ ଦଳ ନୀତୀଶ କୁମାରଙ୍କ ଜେଡିୟୁ ରାଜ୍ୟବ୍ୟାପୀ ଜାତିଗତ ସର୍ବେକ୍ଷଣର ଫଳାଫଳ ପ୍ରକାଶ କରିବା ପରେ ଜାତୀୟ ଜାତିଗତ ଜନଗଣନା ପାଇଁ ଦାବି ଉଠିଥିଲା। ଗତବର୍ଷ ଅକ୍ଟୋବରରେ ପ୍ରକାଶିତ ଏହି ସର୍ଭେରୁ ଜଣାପଡିଥିଲା ଯେ ରାଜ୍ୟର ୮୦ ପ୍ରତିଶତରୁ ଅଧିକ ଲୋକ ଅତ୍ୟନ୍ତ ପଛୁଆ ବର୍ଗର ଅଟନ୍ତି। ଏହା ପୂର୍ବରୁ ସରକାରୀ ଚାକିରିରେ ଲାଟେରାଲ ଏଣ୍ଟ୍ରି ନିଯୁକ୍ତିକୁ ନେଇ ହଙ୍ଗାମା ହେବା ପରେ ପାସୱାନ ସ୍ପଷ୍ଟ କରିଥିଲେ ଯେ ତାଙ୍କ ଦଳ ସର୍ବଦା ଜାତିଗତ ଜନଗଣନା ସପକ୍ଷରେ ରହିଛି। ଗତବର୍ଷ ସଂସଦରେ ପାରିତ ହୋଇଥିବା ମହିଳା ସଂରକ୍ଷଣ ଆଇନର କାର୍ଯ୍ୟକାରିତା ମଧ୍ୟ ଜନଗଣନା ସରିବା ସହ ଜଡ଼ିତ।
