ମହାରାଷ୍ଟ୍ରରେ ବର୍ଷା ବିତ୍ପାତ
ମହାରାଷ୍ଟ୍ରରେ ପ୍ରବଳ ବର୍ଷା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି | ସହରର ଅଧିକାଂଶ ଅଂଚଳରେ ଜଳବନ୍ଦୀ ସ୍ଥିତି ଉପୁଜିଛି। ମୁମ୍ବାଇ ସହରରେ ଜଟିଳ ସ୍ଥିତି ସୃଷ୍ଟି ହୋଇଛି। ମୁମ୍ବାଇରେ ଜଳବନ୍ଦୀ ସ୍ଥିତି ଯୋଗୁଁ ଅନେକ ଅଂଚଳର ପରିବହନ ଠପ୍ ହୋଇଯାଇଛି। କିଛି ସ୍ଥାନରେ ଅଣ୍ଟାଏ ଉଚ୍ଚା ପାଣି ଜମା ହୋଇଛି। ପ୍ରବଳ ବର୍ଷା ଯୋଗୁଁ ଅନ୍ଧେରୀରେ ଜଣେ ମହିଳା ମୁକୁଳା ଡ୍ରେନ୍ରେ ଖସିପଡ଼ି ପ୍ରାଣ ହରାଇଛନ୍ତି। ତାଙ୍କୁ ହସ୍ପିଟାଲ୍ ନିଆଯାଉଥିବାବେଳେ ବାଟରେ ତାଙ୍କର ମୃତ୍ୟୁ ହୋଇଯାଇଛି। ମୃତକଙ୍କ ନାଁ ବିମଳ ଅନୀଲ ଗାଏକ୍ବାଡ। ସେହିପରି ରାୟଗଡ଼ରେ ଜଣେ ମହିଳାଙ୍କର ଜଳପ୍ରପାତରେ ବୁଡ଼ି ମୃତ୍ୟୁ ହୋଇଥିବା ବେଳେ କଲ୍ୟାଣରେ ୨ ଜଣଙ୍କର ବଜ୍ରପାତରେ ମୃତ୍ୟୁ ହୋଇଛି।
ବିଏମ୍ସି ପକ୍ଷରୁ ଆଜି ମୁମ୍ବାଇରେ ସମସ୍ତ ସ୍କୁଲ୍ ଏବଂ କଲେଜ ଛୁଟି ଘୋଷଣା କରାଯାଇଛି। ଆବଶ୍ୟକ ସ୍ଥଳେ ଜଳବନ୍ଦୀ ଯୋଗୁଁ ଅଧିକ ବିପଦ ଆଶଙ୍କା ଥିବା ଅଂଚଳର ଲୋକମାନଙ୍କୁ ଘର ଛାଡ଼ିବାପାଇଁ କୁହାଯାଇଛି। ଖରାପ ପାଗ ଯୋଗୁଁ ବିମାନ ଚଳାଚଳ ମଧ୍ୟ ବାଧାପ୍ରାପ୍ତ ହୋଇଛି। ବର୍ଷା ଯୋଗୁଁ ରେଳ ସେବାରେ ମଧ୍ୟ ଗୁରୁତର ବାଧା ଉପୁଜିଛି।
