କଟକ-ଭୁବନେଶ୍ବରକୁ ମିଳିବ ଦ୍ବୈତନଗରୀ ମାନ୍ୟତା
କଟକ-ଭୁବନେଶ୍ବରକୁ ବିଧିବଦ୍ଧ ଦ୍ବୈତନଗରୀ ଭାବେ ସ୍ବୀକୃତି ଦେବା ପ୍ରସଙ୍ଗ ପୁଣି ଥରେ ସାମନାକୁ ଆସିଛି।ପୂର୍ବତନ ମନ୍ତ୍ରୀ ସମୀର ଦେ’ଙ୍କ ପ୍ରସ୍ତାବକୁ ଗ୍ରହଣ କରି ଏ ପ୍ରସଙ୍ଗରେ ଆଗକୁ ଆଲୋଚନା କରି ପଦକ୍ଷେପ ନିଆଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନଚରଣ ମାଝୀ।
ସୂଚନାଯୋଗ୍ୟ ଯେ ୨୦୦୪ରୁ ୨୦୦୯ ମଧ୍ୟରେ କଟକ-ଭୁବନେଶ୍ବର ଦ୍ବୈତନଗରୀ ଘୋଷଣା ପ୍ରକ୍ରିୟା ଆରମ୍ଭ ହୋଇଥିଲା। ହାଇଦ୍ରାବାଦ-ସିକନ୍ଦରାବାଦ୍ ଢାଞ୍ଚାରେ ଏହି ଦୁଇଟି ସହରକୁ ଦ୍ବୈତ ନଗରୀ, ଯମଜ ନଗରୀ ଅଥବା ଯୁଗ୍ମ ନଗରୀ ମାନ୍ୟତା ଦେବାର ବିଚାର ଆସିଥିଲା। ଭୁବନେଶ୍ବରକୁ ପୌରନିଗମ ଘୋଷଣା କରାଯାଇଥିବା ବେଳେ କଟକକୁ ବି ପୌରନିଗମ ମାନ୍ୟତା ମିଳିଥିଲା। କଟକ-ଭୁବନେଶ୍ବର ସହରକୁ ଗୋଟିଏ ପୁଲିସ ବ୍ୟବସ୍ଥା ଅର୍ଥାତ କମିସନରେଟ୍ ପୁଲିସ ଅଧୀନରେ ରଖାଯାଇଥିଲା। କିନ୍ତୁ ତା’ ପରେ ଦୁଇଟି ସହରକୁ ବିଧିବଦ୍ଧ ଭାବେ ଦ୍ବୈତନଗରୀ ଘୋଷଣା ପ୍ରକ୍ରିୟା ଅଟକି ଯାଇଥିଲା।
ଗଲା ୧୫ ବର୍ଷ ହେଲା ଏହି ଯୋଜନା ଓ ପ୍ରସ୍ତାବ ଏକପ୍ରକାର ଶୀତଳଭଣ୍ଡାରରେ ପଡ଼ି ରହିଛି। ଫଳରେ କଟକରୁ ବି ବିଭିନ୍ନ ସମୟରେ ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ ଭୁବନେଶ୍ବରକୁ ଉଠିବା ପ୍ରକ୍ରିୟା ଜାରି ରହିଛି। ଭୁବନେଶ୍ବରରେ ଭିତ୍ତିଭୂମି ବିକାଶ ତୁଳନାରେ କଟକ ବି ପଛରେ ପଡ଼ି ଯାଇଛି।
