ଡାଳିମ୍ବ ଚୋପାରୁ ଫର୍ଟିଲାଇଜର୍; ଗଛକୁ ଦେବ ପୋଷକ ତତ୍ତ୍ୱ
ପ୍ରାୟ ଲୋକ ଡାଳିମ୍ବରୁ ଚୋପା ଛଡାଇବା ପରେ ଫିଙ୍ଗି ଦେଇଥାନ୍ତି । କିନ୍ତୁ ଜାଣନ୍ତି କି ଏହା ଗଛମାନଙ୍କ ପାଇଁ ପୋଷକ ତତ୍ତ୍ୱ ଭାବେ କାମ କରିଥାଏ । ଶରୀରକୁ ସୁସ୍ଥ ରଖିବା ପାଇଁ ଆମେ ବିଭିନ୍ନ ଫଳ ଖାଇଥାଉ । କିନ୍ତୁ ଫଳ ଖାଇବା ପରେ ମଞ୍ଜି ଓ ଚୋପାକୁ ଅନାବଶ୍ୟକ ଭାବି ଫିଙ୍ଗି ଦେଇଥାଉ । କିନ୍ତୁ ଜାଣନ୍ତି କି ଏସବୁକୁ ଫିଙ୍ଗିବା ପରିବର୍ତ୍ତେ ବଗିଚାରେ ଥିବା ଗଛମାନଙ୍କ ପାଇଁ ପୋଷକ ତତ୍ତ୍ୱ ଭାବେ ବ୍ୟବହାର କରିପାରିବେ । ସେଓ ଓ ପିଜୁଳିକୁ ବହୁ ଲୋକ ଚୋପା ସହ ଖାଇଥାନ୍ତି । କିନ୍ତୁ ଡାଳିମ୍ବ, ନାସପାତି ଆଦି କେତେକ ଫଳର ଚୋପା ଓ ମଞ୍ଜି ବାହାର କରିବାକୁ ପଡିଥାଏ । ଏହାକୁ ଫିଙ୍ଗିବା ପରିବର୍ତ୍ତେ ଗଛମାନଙ୍କର ଖାଦ୍ୟ ବା ପେଷ୍ଟିସାଇଡ୍ ସ୍ପ୍ରେ ଭାବେ ବ୍ୟବହାର କରିପାରିବେ ।
ପ୍ରାୟ ସମସ୍ତେ ଗଛ ପାଇଁ ବଜାରରୁ ପୋଷକ ତତ୍ତ୍ୱ କିଣିଥାନ୍ତି । କିନ୍ତୁ ବିନା ପଇସା ଖର୍ଚ୍ଚରେ ମଧ୍ୟ ଡାଳିମ୍ବ ଚୋପାକୁ ପ୍ରାକୃତିକ ଖାଦ୍ୟ ଭାବେ ବ୍ୟବହାର କରିପାରିବେ । ଏଥିପାଇଁ ଡାଳିମ୍ବ ଚୋପାକୁ ଗୋବର ସହ ମିଶାଇ କିଛି ଦିନ ପାଇଁ ଢାଙ୍କି ରଖି ଦିଅନ୍ତୁ । ଏକ ସପ୍ତାହ ପରେ ଏହାକୁ ବିଭିନ୍ନ ଗଛ ମୂଳରେ ଦେଇପାରିବେ । ଗଛ ମୂଳରେ ବ୍ୟବହାର କରିବା ପୂର୍ବରୁ ଏହାକୁ ଭଲ ଭାବେ ମିଶାଇ ନିଅନ୍ତୁ ।
ଡାଳିମ୍ବ ଚୋପାକୁ ଛଡାଇ ଭଲ ଭାବେ ଶୁଖାଇ ଗୁଣ୍ଡ କରି ଗଛ ମୂଳରେ ବ୍ୟବହାର କରିପାରିବେ । ପ୍ରଥମେ ଚୋପାଗୁଡିକୁ ଏକାଠି କରି ଖରାରେ ଶୁଖାଇ ନିଅନ୍ତୁ । ଭଲ ଭାବେ ଶୁଖିଯିବା ପରେ ଏହାକୁ ଗ୍ରାଇଣ୍ଡରରେ ପେଶି ନିଅନ୍ତୁ । ଏହି ଗୁଣ୍ଡକୁ କୌଣସି ଏୟାର୍ଟାଇଟ୍ କଣ୍ଟେନର୍ରେ ରଖି ଦିଅନ୍ତୁ । ଆବଶ୍ୟକ ବେଳେ ଏହି ଗୁଣ୍ଡରେ ମାଟି ମିଶାଇ ଗଛ ମୂଳରେ ଦେଇପାରିବେ ।
