ଜଙ୍ଗଲ କମୁଛି, ଜବରଦଖଲ ବଢ଼ୁଛି , ରାଜ୍ୟ ସରକାରଙ୍କ ସତ୍ୟପାଠ ଦାଖଲ
ଓଡ଼ିଶାରେ ମୋଟ୍ ୫୨ଲକ୍ଷ ୧୫ ହଜାର ୫୯୬ ହେକ୍ଟର ଜଙ୍ଗଲ ଅଞ୍ଚଳ ରହିଛି । ସେଥିରୁ ୪୦ ହଜାର ୫୦୭ ହେକ୍ଟର ଜଙ୍ଗଲ ଜମି ଜବରଦଖଲକାରୀଙ୍କ କବ୍ଜାକୁ ଚାଲିଗଲାଣି । ସର୍ବାଧିକ ନବରଙ୍ଗପୁର ଜିଲ୍ଲାର ଜଙ୍ଗଲ ଜମି ରହିଛି ଜବରଦଖଲକାରୀଙ୍କ କବଳରେ ଅଛି । କେବଳ ଆଦିବାସୀ ଅଧ୍ୟୁଷିତ ଜିଲ୍ଲା ନୁହେଁ ଉପକୂଳବର୍ତ୍ତୀ କେନ୍ଦ୍ରାପଡ଼ା, କଟକ, ଜଗତସିଂହପୁର ଆଦି ଜିଲ୍ଲାରେ ବହୁ ପରିମାଣର ଜଙ୍ଗଲ ଜମି ଜବରଦଖଲରେ ରହିଛି । ସରକାର ସ୍ୱୀକାର କରୁଛନ୍ତି ଯେ, ଜଙ୍ଗଲ କମୁଥିବା ବେଳେ ଜବରଦଖଲ ବଢିବାରେ ଲାଗିଛି ।
ନବରଙ୍ଗପୁରରେ ୨୩ ହଜାର ୬୬୭ ହେକ୍ଟର ଜଙ୍ଗଲ ଜମି ଜବରଦଖଲ କରାଯାଇଛି । ସେହିପରି ଶିଳ୍ପ, ଖଣିଖାଦାନର ଜିଲ୍ଲା ସୁନ୍ଦରଗଡ଼ରେ ୩ ହଜାର ୭୦୭ ହେକ୍ଟର ଜମି, କଳାହାଣ୍ଡି ଜିଲ୍ଲାରେ ୨୩୨୭ ହେକ୍ଟର ଜଙ୍ଗଲ ଜମି, ରାୟଗଡ଼ା ଜିଲ୍ଲାରେ ୧୬୦୨ ହେକ୍ଟର, କେନ୍ଦୁଝର ଜିଲ୍ଲାରେ ୧୭୮୦ ହେକ୍ଟର, କୋରାପୁଟ ଜିଲ୍ଲାରେ ୧୨୮୧ ହେକ୍ଟର ଓ ଗଞ୍ଜାମ ଜିଲ୍ଲାରେ ୧ ହଜାର ହେକ୍ଟର ଜଙ୍ଗଲ ଜମି ଜବରଦଖଲକାରୀଙ୍କ କବ୍ଜାକୁ ଚାଲିଯାଇଛି ।
କଟକ ଏବଂ କେନ୍ଦ୍ରାପଡ଼ା ଜିଲ୍ଲାରେ ୧୫୮୧ ହେକ୍ଟର ଜଙ୍ଗଲ ଜମି ଜବରଦଖଲକାରୀଙ୍କ ଦଖଲକୁ ଚାଲିଯାଇଛି । ଏଥିରୁ ୧୨ଶହ ହେକ୍ଟର ଜମି କେବଳ କେନ୍ଦ୍ରାପଡ଼ା ଜିଲ୍ଲାରେ ରହିଛି । ଆୟତନ ଦୃଷ୍ଟିରୁ ଅତ୍ୟନ୍ତ ଛୋଟ ଜିଲ୍ଲା ଭାବେ ପରିଚିତ ଜଗତସିଂହପୁର ଜିଲ୍ଲାର ଜଙ୍ଗଲ ଜମି ମଧ୍ୟ ଜବରଦଖଲକାରୀଙ୍କ କବ୍ଜାରେ । ଏହି ଜିଲ୍ଲାରେ ୭୫୬ ହେକ୍ଟର ଜଙ୍ଗଲଜମି ହଡ଼ପ ହୋଇଛି ।
୨୦୦୫ ମସିହାରେ ଜଙ୍ଗଲ ଜମିକୁ ନେଇ ଏକ ଆଇନ ଆସିଥିଲା । ଉକ୍ତ ଆଇନ ଅନୁଯାୟୀ, ଯଦି ୨୦୦୫ ପୂର୍ବରୁ କେହି ଜଙ୍ଗଲ ଜମି ଜବରଦଖଲ କରିଥିବାର ଜଣାପଡ଼େ ତାହେଲେ ସେ ଯଦି ଉପଯୁକ୍ତ ହିତାଧିକାରୀ ବା ଭୂମିହୀନ ହୋଇଥିବେ ତାହେଲେ ତାଙ୍କ ନାମରେ ଉକ୍ତ ଜମିକୁ କରି ଦିଆଯିବ । ଇତିମଧ୍ୟରେ ଏହି ଆଇନ ଆସିବାକୁ ୧୮ବର୍ଷ ବିତିଗଲାଣି । ହେଲେ ଜମି ଜବରଦଖଲକାରୀଙ୍କ ତାଲିକା ବଢ଼ିବାରେ ଲାଗିଛି । ସେତେବେଳେ ଜଙ୍ଗଲଜମି ଜବରଦଖଲ ପରିମାଣ ଯେତିକି ରହିଥିଲା ଏବେ ତାହା କମିବା ପରିବର୍ତ୍ତେ ବୃଦ୍ଧି ପାଇଛି । ତେଣୁ ରାଜ୍ୟ ସରକାର ଉପଯୁକ୍ତ ପଦକ୍ଷେପ ନେଇଥାନ୍ତେ ତେବେ ଜବରଦଖଲକାରୀଙ୍କ ସଂଖ୍ୟା ହ୍ରାସ ପାଇଥାନ୍ତା |
