ସିଗନାଲ ତ୍ରୁଟି ଯୋଗୁଁ ବାହାନଗାରେ ଘଟିଲା ଅଘଟଣ…

ସିଗନାଲରେ ତ୍ରୁଟି ଯୋଗୁଁ ଘଟିଲା ବାହାନଗା ଦୁର୍ଘଟଣା। ସିଗନାଲ ବିଭାଗର କର୍ମଚାରୀଙ୍କ ମାନବିକ ତ୍ରୁଟିକୁ ଦାୟୀ କରିବା ସହ ଯାନ୍ତ୍ରିକ ତ୍ରୁଟି କିମ୍ବା ମେସିନ୍‌ରେ ତ୍ରୁଟି ଦେଖାଦେବାର ସମ୍ଭାବନାକୁ ଖଣ୍ଡନ କରିଛନ୍ତି ରେଳ ସୁରକ୍ଷା କମିସନର୍। ବିଶେଷ କରି ତିନି ବର୍ଷ ତଳେ ନିରାପତ୍ତା କାରଣରୁ ଡିଜାଇନ୍‌ରେ ପରିବର୍ତ୍ତନ ହେବା ପରେ ଯାଞ୍ଚର ପର୍ଯ୍ୟାପ୍ତ ସୁରକ୍ଷା ପଦ୍ଧତି ଅନୁସରଣ କରାଯାଇ ନଥିବା କେତେକ ଗ୍ରାଉଣ୍ଡ ଅଧିକାରୀଙ୍କ ଅବହେଳାକୁ ଦର୍ଶାଯାଇଛି। କେବଳ ସିଗନାଲିଂ ବିଭାଗରେ ନୁହେଁ, ଡିଜାଇନରେ ପରିବର୍ତ୍ତନ ଆଣି ନଥିବା ଅନ୍ୟମାନଙ୍କ ସୁରକ୍ଷା ପ୍ରକ୍ରିୟା ପ୍ରତି ଅବହେଳାକୁ ଦର୍ଶାଯାଇଛି। କେନ୍ଦ୍ରୀୟ ଡାଇଗ୍ରାମ ସର୍କିଟରେ ହୋଇଥିବା ପରିବର୍ତ୍ତନକୁ ପ୍ରତିଫଳିତ କରିବାରେ ବିଫଳ ହୋଇଥିଲା। ପରବର୍ତ୍ତୀ ସମୟରେ କରାଯାଇଥିବା ବାର୍ଷିକ ଯାଞ୍ଚରେ ମଧ୍ୟ ତାହା ପ୍ରତିଫଳିତ କରି ନଥିଲା। ତେଣୁ ଏହା ଜଣେ ବ୍ୟକ୍ତିଙ୍କ ଭୁଲ ନୁହେଁ, ବରଂ ଏଥିରେ ଏକାଧିକ ବ୍ୟକ୍ତିଙ୍କ ତ୍ରୁଟି ରହିଛି। ବାଲେଶ୍ୱର ବହାନଗା ଟ୍ରେନ୍‌ ଦୁର୍ଘଟଣାରେ ୨୯୩ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦୦୦ ରୁ ଅଧିକ ଆହତ ହୋଇଥିଲେ। ସିବିଆଇ ଦୁର୍ଘଟଣାରେ ଅପରାଧିକ ଷଡ଼ଯନ୍ତ୍ରର ତଦନ୍ତ କରୁଛି।